啟晴邨食水超標 濾水器除鉛 8條Q&A

九龍灣啟晴邨食水含鉛量超出世衛標準，全城恐慌；更掀起一片除鉛濾水器搶購熱，有店舖向 ezone.hk 記者表示除鉛濾水器這幾天賣得好勁已斷市，最快要 2 至 3 天返貨！

真係咁堅？ezone.hk 記者請來香港浸會大學理學院生物系副系主任翁建霖教授，拆解一切關於除鉛濾水器之謎。

e = ezone.hk 記者
翁 = 翁建霖教授

e：市面上的濾水器，是否有除鉛功能？

翁：市面上的產品要注意一點，不是每款濾水器都有除鉛功能，即使有，也未必經過嚴謹測試。理論上，具有活性炭成分的濾水器，活性炭能夠吸走水裡的鉛。

但要注意兩點：

首先活性炭需要一定時間才能吸走水裡的鉛，大概 1 至 2 分鐘才見效，假如是水龍頭式濾水器，水很快穿過活性炭濾水器沖出去，不夠時間停留，除鉛效果不會理想；此外活性炭芯會老化，吸滿鉛又不更換的話，同樣會失去效果。

e：如果延長煲水時間，可以「殺死」鉛嗎？

翁：如果水裡含鉛，煲水時間愈長，水的含鉛量只會愈高！因為煲水愈久，更多水份蒸發咗，但不能殺死鉛，結果鉛的濃度反而增加！

e：呢樣又唔得，嗰樣又唔得，咁咪死硬？

翁：相比活性炭，其實 Ion-exchange Resin 離子交換樹脂，與及活性鋁，都是更有效的除鉛物質，不過這些物質多見於較大型兼昂貴的濾水器，動軏數千元以上，民用市場未必易搵。

e：仲有冇其他方法呀？

翁：煲水愈久，含鉛愈高！用蒸餾又唔同講法！蒸餾有效除鉛，如果你把含鉛水拎去蒸餾，是有效的。

e：公屋才有食水含鉛問題？私樓和商廈乜環境？

翁：一般而言，舊式樓宇才會有呢個問題，因為舊式水喉是用有鉛物質製造，新建大廈唔應該出現食水含鉛的。不過，大自然的重金屬、油漆裡都可能含鉛，可能導致水裡產生鉛，但也唔應該超標。

至於焊接位含鉛呢個說法，現在應該冇人再提吧？應該沒有此事，就算真是焊接位含鉛，都不會去到超出世衛標準咁高，而且經過歲月洗禮，無理由到今天仍然有咁高含鉛量，所以「焊接位含鉛導致超標」是不成立的。

e：市民可以自己 check 食水是否含鉛？

翁：不可以，必須使用專門測試重金屬的專業儀器，你用普通水樽盛載水，水樽本身可能也含鉛呢！

e：食水含鉛全城恐慌，其實鉛只會「蝦細路仔」？

翁：如果是低量就沒大問題，如果是高量就有危險。根據美國標準，如果含鉛量高於 60 微克，就是急性中毒，即使是成年人，也需要吃藥的。

因為高含鉛量會影響人的神經系統可能鬧情緒、影響肝臟和腎臟功能、影響血液系統；如果是小朋友，超過 10 微克已有可能影響智力發展。仲有喎，就咁鉛都算，如果是鉛離子，即鉛黏住有機物質如蛋白質，被人體吸收，負面影響更大。

e：除了鉛，仲有乜嘢金屬對人體有影響？

翁：鋅 zinc 對人體影響不大；錳 manganese 如果吸入很多也會影響神經系統。但鋅和錳對人體的傷害，亦遠不及鉛明顯。

全文刊於ezone.hk。

更多科技潮流資訊，盡在ezone.hk